Description

பொன்னியின் செல்வன் – அமரர் கல்கி எழுதிய புகழ் பெற்ற தமிழ் வரலாற்றூப் புதினமாகும். 1950 – 1955 ஆண்டு வரை கல்கி வார இதழில் தொடர்கதையாக வெளியிடப்பட்டது. இப் புதினத்துக்குக் கிடைத்த மக்கள் ஆதரவு காரணமாகத் தொடர்ந்தும் பல்வேறு காலகட்டங்களில் இதே புதினத்தைக் கல்கி இதழ் தொடராக வெளியிட்டது. தவிர தனி நூலாகவும் வெளியிடப்பட்டுப் பல பதிப்புக்களைக் கண்டுள்ளது. கி.பி. 1000 ஆம் ஆண்டு வாக்கில் இருந்த சோழப் பேரரசை அடிப்படையாகக் கொண்டு இந்த வரலாற்றுப் புதினம் எழுதப்பட்டிருக்கிறது.

சோழர்களின் பொற்கால ஆட்சியைப் பற்றி சரித்திர நூல்களில் இருந்து தெரிந்துகொண்டதைக் காட்டிலும், பொன்னியின் செல்வனில் இருந்தே பெரும்பாலான தமிழர்கள் ஆர்வத்துடன் கற்றிருக்கிறார்கள்.

அவ்வளவு நேர்த்தியான எழுத்துக்களை இதுவரையில் எந்த ஒரு எழுத்தாளனாலும் தந்திருக்க முடியாது. கல்கி ஒருவரால் மட்டுமே இது சாத்தியம் ஆனது. மூன்று முறை இந்தப் புதினம் ஆங்கிலத்தில் மொழி பெயர்க்கப்பட்டதும் குறிப்பிடத்தக்கது. இந்நூலைப் படிக்கும் போதே இக்கதையின் கதா பாத்திரங்களான வந்தியத் தேவன், குந்தவை, அருள்மொழிவர்மன், சுந்தர சோழர், நந்தினி, ஆழ்வார்க்கடியான் நம்பி, அநிருத்தப் பிரம்மராயர், வானதி, பெரிய பழுவேட்டரையர், சின்னப் பழுவேட்டரையர், செம்பியன் மாதேவி, ஆதித்த கரிகாலன் என அனைவரும் உங்கள் அருகிலேயே வலம் வருவதைப் போல வாசகர்களாகிய நீங்கள் நிச்சயம் உணவீர்கள். படிக்கப் படிக்க திகட்டாத நூல் இது. இதனை ஐம்பது முறை கூட படித்தவர்கள் உண்டு.

இந்தப் புத்தகத்தை நீங்கள் படிக்கும் சமயத்தில் சீக்கிரம் இந்தக்கதை முடிந்து விடக் கூடாது என்று ஏங்குவீர்கள்.

தமிழர்களின் உயிரோடும் உணர்வுகளோடும் ஒன்றிக் கலந்துவிட்ட பொன்னியின் செல்வனை அடுத்த தலைமுறைக்கு அறிமுகப்படுத்துங்கள்.